السلام عليكم من جديد :
ده الجزء التانى من النكت اللى اتمنى ان تكون عجبتكم
مره واحد بخيــل ابوه مات ....عيط عليه بعين واحدة....
واحد اتزنق فى ربع جنيه عدى من الخرم...
واحد تعب من المشي جرى....
واحد كريم اوى اوى بيته ولع..اتصل بالمطافى...لما جم يطفوا النار...قالهم:لا يمكن لازم تتغدوا الاول...
اتنين حبوا بعض لكن بعض ما حبهمش...هاهاهاهااى..
مره فيل داس على نملة...قالتله: يا واد يا تقيل...
مره واحد بلدياتنا عطس... عور اللى ادامه....
واحد بلديتنا راح للدكتور واشتكى له من وجع فى رجله نتيجة وقوعه على السلم ...فكتب له على مرهم وقال له:تدهن مكان ما وقعت ....بلدياتنا راح دهن السلم....هاها.
اتنين صحاب قاعدين مع بعض فى البلكونة...الاول:واحد وقع من الدور التالت لقى ايه؟..التانى:مش عارف..الاول:لقى حتفه.طب واحد وقع من الدور الرابع لقى ايه؟..التانى:مش عارف..الاول:لقى مصرعه. طب واحد وقع من الدور الخامس لقى ايه؟..التانى:مش عارف..الاول:لقى ربه. طب واحد وقع من الدور السادس لقى ايه؟..التانى:مش عارف..الاول:لقى اللى وقعوا قبله..التانى راح سايبه ونط من البلكونة..
ليه بلدياتنا بيحط فى ايده الشمال زلطة و اليمين كبريت؟ الزلطة علشان يكسر اللمبة والكبريت علشان يتأكد انها اتكسرت.....
راجل متجوز وعنده دولاب فى البيت ممنوع اى يفتحه غيره..مراته حيقتلها الفضول عاوزه تعرف الدولاب فيه ايه؟ لكن الراجل مش مديها اى فرصة,المهم فضلت طوال عشرين سنة منتظرة الفرصة لحد ما فى يوم نسي يقفل الدولاب ونزل ففتحته فلقيت عشرين الف جنية وبيضتين فجريت على جوزها وسألته عن سر الموضوع ده وأصرت انها تعرف فقالها اقولك بس توعدينى انك تسامحينى,قالت له اوعدك...قالها:بصراحة انا كنت كل ما اخونك اجيب بيضة واحطها فى الدولاب, فالست قالت فى نفسها مرتين خيانة فى عشرين سنة ماشى سامحتك... بس العشرين الف جنيه دول بتوع ايه..قال لها:ابدا انا كنت كل ما اكمل كرتونة ابيعها!!!!!!!!!!....
واحد بواب كل يوم ينزل ينادى على مراته ويقول لها:عاوزة حاجة قبل ما اروح الشغل.. فتقوله: لأ..يروح قاعد على الدكة.....
ازاى ندخل الفيل داخل زجاجة سفن اب؟...اسهيه وهو بيشربها وازقه فيها....
كان فيه قرية كلها اغبياء وكان فيها حفرة وكل الناس بتقع فيها وبتتعور.. العمدة جمع اذكى 3 فى القرية عشان يحلوا المشكلة اول واحد..احنا نبنى مستشفى بجانب الحفرة الللى يقع يدخل يتعالج ...العمدة:انت غبي اوى..التانى:احنا نجيب اسعاف بجانب الحفرة اللى يقع الاسعاف توديه المستشفى..العمدة:انت اغبي منه...التالت:ياحضرة العمدة احنا نردم الحفرة دى ونعمل واحده تانية جنب المستشفى....
واحد ماشى فى الشارع لقى حفرة فيها سلحفة عامله انها راكبة موتوسيكل وبتقول فو فو..طنش ومشى..شويه ولقى حفرة تانية وبرضه فيها سلحفة عامله انها راكبة موتوسيكل وبتقول فو فو..وبعد شوية لقى حفرة تالته فيها سلحفة بس ساكته..قالها:انت مش عامله زى الاتنين التانيين ليه؟ قالت له:هم عاملين ايه؟ قال لها:عاملين انهم راكبين موتوسيكل وبيقولوا فو فو...قالت ايه ده هم جايين..طب فوفو..
ليه الارانب بتخاف تمشى قدام القهوة؟...علشان بيخاف من السحلب المكار...
مره واحد راح للدكتور وقاله:لما احط ايدى فى عينى مابشوفش حاجة.....الدكتور عمله عملية خرملة ايده...
واحد بلدياتنا غنى قوى راح افريقيا ...عشان يصطاد ...ولما رجع سالوه صحابه اصطدت ايه ..قالهم3 غزلان و2 حمار وحشي وييجى 60 او 70 (no please) ...قالولوا ايه نوبليز ده؟..ماعرفش دى حاجات بتتنطط لونها اسود قاعده تقولى نوبليز نوبليز نوبليز....
مره واحد بيلعب بلاى ستيشن ابوه مات...كتب Game over.
مره واحد بلدياتنا جت طوبة في صدره بص وراه....
مره واحد اشتغل فى مصنع روايح ...أوغم عليه...
مره واحد ساعاتى بيصلح الساعة....العقارب قرصته....
مره لعيب كورة سخن...جاتله شوطــة....
مره قفشوا مسطول على الناصية بيقزقز بمب..
مره لعيب كوره شــــاط ....ريحته طلعت......
مره لعيب كورة ضبط الساعة على صدره.....
مره نجار نفسه انكسرت سمرها....
ما هو الفرق بين الكمبيوتر والاسترتش؟.....الاتنين بيجيبوا ادق التفاصيل...
ما هو التشابه بين السما والكدليز؟......الاتنين سبع طبقات..هاااااااااااى..
ليه بلدياتنا مش بيبوس بنته؟؟..لأنه حاطط ديل الجلابيه فى بقه.....هاهاهاهاييى...
ليه بلدياتنا لما بيستحمى بياخد معاه ابره وفتله؟....علشان لو الميا اتقطعت يخيطها.
ليه بلدياتنا بيدق مسمار 10 سم فى صدر ابنه؟....علشان يغلق فيه البزازه..
مره مجنون عقل ....طلق مراته....
مره بلدياتنا شرب القهوة....الكراسي وقفت فى زوره...
مره واحد راح يسوى معاشه...لقى الفرن قافل...
مره واحد بلدياتنا..القطر داس عليه...طلع صباعه مدوحس....
مره مسكوا حرامى في الجمعية...قالهم مش دى جمعية كل واحد ياخدها شهر....
مره واحد راح يدور على ابوه في حادث مجهول...قالولو مافيش فيه علامة...قالهم المرحوم كان أطرش...
مره بلدياتنا نام على السرير بالمقلوب..صحى الصبح لقى رجله مـعمصه..
مره نجار مراته تغسل..وهو ينشر الغســـيل...
مره فران مات ...لقوه نايم على خمـــيرة...
مره فران كل مايشوف زبـــون..يتقمر عليــه.....
مره حلاق خلص الزباين ...وقال لاخر زبون يلا علشان تحلق ...قاله انا مش جاى احلق..انا طلعت عند المدام قالتلى استناه في الصالــون...
مره بلدينا دخل عند حلوانى ..قاله عندك جاتوه..قاله عندى..قاله ادينى قفصين..
أقرع حب واحدة ...معرفش يعبرلها عن شعوره....
مره واحد شد حيله جامد ...قام اتقطع....
مره بلدينا طلع كوبري 6 أكتوبر.. قال كل دى بلكونة...
مره تمرجى كل ما ييجى يضرب حقنة ...مايلاقيش العصاية..
مره سواق تاكسي ماشى على اقصي سرعة فى الزحمة..داس على واحد ونقل على التانى..هاهاا..
مره سواق تاكسى داس بنزين...موته...
دكتور بيطرة بيحب دكتورة بيطرية بيقولها انا حمار فى حبك وهى تقولوا انا مارفصلكش طلب..
مره كهربائى ابنه سخن....ركب له ترانس....
مره واحد حمى التليفزيون فى البحر ...علشان يجيب قناة توشكى...
مره واحد اتخنق من مراته ..ولع في نفسه وحضنها...
مره واحد راح ينشر خبر فى الاهرام مالاقاش حبـــل...
مره واحد لقى صاحبه وقاله امبارح اشوفك انت ومراتك فى البلكونة وما تقوليش اتفضل...قاله لا والله ما أنا....
مره واحد وقع من الدور السابع....قام نفض هدومه...
مره واحد ماشى على كوبري الليمون...فعصه...
اتنين فافى راحوا يدوروا على شغل مالقيوش غير واحد عنده غيط قصب..شغلهم عنده وقالهم ارجع اخر النهار الاقيكم محملين القصب ده كله على العربيات...قالولوا: حاضر يا اونكل...جه الراجل اخر النهار يشوفهم عملوا ايه, لقاهم ماسكين عود قصب وعمالين يقولوا شد يا سوسو شد يا توتو..فقالهم ايه الاخبار يا رجاله..فقالوا: يا اونكل انهارده خلعنا عود وبكره انشاء الله حنقطعه...
مره واحد بيقول لصاحبه ابنك سقط فى المدرسة.... قاله في حد اتعور.....
مره واحد بيقول لمراته انا مصدع قالتله ماتقولش كده..لايجيبولك إزاله...
انا تعبت بجد فى كتابه النكت دى فياريت اشوف ردود لحد ما اجيب الجزء التالت والاخير
موضوع: ادخل وهتضحك يعنى هتضحك 2 
28/4/2009, 6:18 am
